انصار: ( د چنګاښ۱۶مه)، د کرنې، اوبولګولو او مالدارۍ وزارت چارواکي وايي، د دغه وزارت مرستیال د یو شمېر نړیوالو موسسو له چارواکو سره په کتنه کې ویلي چې د کرنې وزارت د معلوماتو له مخې په افغانستان کې د کوکنارو کښت صفر ته رسېدلی دی. هغه وویل چې دا د هیواد او نړۍ لپاره ارزښت لري.
د کرنې، اوبولګولو او مالدارۍ وزارت د اطلاعاتو او عامه پوهاوی رئیس مصباح الدین مستعین وویل چی د کرنې وزارت مرستيال وويل، چې د سرپرست حکومت د مشر له لوري د کوکنارو پر کښت له بنديز سره په افغانستان کې د نشه يي توکو کښت صفر ته رسېدلی او دغه کړنه د هېواد او نړۍ لپاره ارزښتناکه ده.
د کرنې او مالدارۍ وزارت مرستیال زیاته کړه، د زعفرانو زیاتوالی، د کیفیت له پلوه په سیمه او نړۍ کې د افغانستان لومړی مقام او په ملي او نړیوالو بازارونو کې د زعفرانو ښه بیه بې ساري ده، چې لا زیات کار او ملاتړ ته اړتیا لري.
د مولوي عثماني په خبره، په تېرو ۲۰ کلونو کې د امریکا له راتګ سره په هېواد کې شاوخوا څلور میلیونه کسان روږدي شوي او د سرپرست حکومت له لوري یې درملنه شوې ده.
په همدې حال کې د سلام خیریه بنسټ مشرې اغلې سیمونا فرناندز چې د ایټالیا له خوا یې ملاتړ کېږي، د کرنې وزارت له یوه چارواکي سره په خبرو کې وویل چې دغه بنسټ غواړي له افغانستان سره د کرنې په برخه کې همکاري وکړي.
په نړیوالو اړیکو کې د اروپا د پارلمان سلاکار باسم هاتف له نورو هېوادونو سره د طالبانوحکومت پر ښو اړیکو ټینګار وکړ او ویې ویل افغانستان یوازینی هېواد دی چې استعمار نه مني.
د کرنې وزارت د اطلاعاتو او عامه پوهاوي رئیس زیاتوي، چې د دغه وزارت رهبري هڅه کوي، چې د ملي او نړیوالو بنسټونو د همکارۍ په جلبولو سره خلکو په ځانګړې توګه بزګرانو او مالدارانو ته خدمات وړاندې کړي.
URL تعقيب: https://www.ansarpress.com/pashto/32370
